14.03.2025
Темәстән Шәфҡәт Юнысов “Һаҡмар” һәм “Йәшлек”кә яҙылып ҡар таҙартыу машинаһы отто!
“Шундай шәп бүләк отҡанымды беренсе минуттарҙа уҡ белдем, тиергә була. Сөнки “Юлдаш” телеканалында эшләгән Наил Юнысов атаһына шылтыратҡан. Улар беҙҙән һөйөнсө алды. Ҡыуанысыбыҙҙың сиге юҡ. Ҙур рәхмәт барығыҙға ла!”-тине Шәфҡәт Морат улы.
Шундай шәп бүләккә юл уйламағанда һалына. “Һаҡмар” гәзитенең квитанцияһын “Һаҡмар”ға яҙыл һәм бүләк от!” акцияһына алып килгән Юнысовтарҙан Баймаҡ мәғлүмәт үҙәге бухгалтеры Эльвира Ҡыҙрасова: “Тағы ниндәй баҫмаларға яҙылаһығыҙ?”-тип һорай. Ғаилә башҡорт телендәге район гәзитен һәм “Йәшлек”те яратып уҡыуҙарын белдерә һәм һәр саҡ шул баҫмаларҙы алдырыуҙарын әйтә.
Эльвира Азат ҡыҙы Юнысовтарға “Республика Башҡортостан” нәшриәт йорто үткәргән уйында ла бәхетен һынап ҡарарға кәңәш итә һәм гәзиттәрҙең квитанцияһын да ебәрергә ярҙам итә.
Әйткәндәй, беҙҙең нәшриәт йорто ярты йыл һайын бик шәп һәм ҡиммәтле бүләктәр уйната. Уны тура эфирҙа күрһәтәләр. Шуны ла билдәләп үтергә кәрәк, был беҙҙең район уҡыусылары отҡан өсөнсө ҡар таҙартыу машинаһы! Шәп бит?!
Унан тыш ноутбук һәм башҡа эре приздар отоусылар булды.
Ғүмер буйы”Һәүәнәк” совхозында намыҫлы эшләп, хәҙер хаҡлы ялда булған Шәфҡәт Морат улының призға төшкән техникаһын оҙайлы йылдар рәхәтләнеп тотоноуын теләйбеҙ. Ул дәртләнеп: “Ҡайтҡас та икенсе ярты йыллыҡҡа яҙылып, квитанцияларҙы тағы ла “Һаҡмар” редакцияһына ла, “Республика Башҡортостан” нәшриәт йортона ла ебәрергә кәрәк. Имен-һау эшләгеҙ!”-тине.
Эйе, елле бүләкле булыуҙың сере бик ябай. Район гәзитенә һәм бер республика баҫмаһына яҙылырға һәм квитанцияларҙы “Республика Башҡортостан” нәшриәт йортона ебәрергә. Уйын һәм нәшриәт йортоноң баҫмалары тураһында мәғлүмәтте ошо сайттан ҡарағыҙ rbsmi.ru.
Бынан тыш “Һаҡмар” гәзитенә 31 мартҡа тиклем яҙылып өлгөргәндәр араһында “Березки” шифаханаһына путевка, робот саң һурҙырғыс һәм башҡа бүләктәр уйнатыла! Ятып ҡалғансы, атып ҡал! “Һаҡмар”ға яҙыл һәм бүләктәр от!
Источник: "Газета Баймакского района"